Álfasteinn í Hörgársveit er Heilsuleikskóli rétt norðan Akureyrar. Hann stendur ofan við þjóðveginn umlukinn trjágróðri. Nafn leikskólans er dregið af bóndabænum Dvergasteini norðan við Álfastein. Leikskólinn er fjögra deilda, Ljósálfadeild fyrir 1 árs, Álfadeild fyrir 2 - 3 ára, Dvergadeild og Trölladeild báðar fyrir 3-6 ára. Hann er opinn frá 7:45 til 16:15.

Leikskólinn tók til starfa 30. júlí árið 1995 og var hann þá 114 fm. með rými fyrir 16 börn. Þann 9. júní 2007 var 160 fm. viðbygging við leikskólann vígð og var þá rými fyrir 32 börn. Vegna mikillar aðsóknar að leikskólanum og stækkandi sveitarfélags var tekin ákvörðun um að stækka hann enn frekar. Þann 1. mars 2018 var fyrsta skóflustunga tekin að 109 fm viðbyggingu sem vígð var 9. ágúst 2019, þar er vinnuaðstaða kennara, kaffistofa og fl. Á sama tíma var fyrrum vinnuaðstöðu kennara breytt í deild sem nú heitir Trölladeild og voru þá 44 börn í leikskólanum. Í mars 2021 var þriðja deildin, Dvergadeild, tekin í notkun og 12. apríl 2023 var fjórða deildin, Ljósálfadeild, tekin í notkun og eru nú 74 börn í leikskólanum. Þann 2. júní 2023 var tekinn í notkun síðasti hluti viðbyggingar. Starfsmannarými með fundaraðstöðu, kaffistofu og sérkennsluherbergi. Nú er leikskólinn rúmir 885 fm að stærð með dvalarrými fyrir 90 börn.

Einkunnarorð Álfasteins eru: „Með sól í hjarta“

Mikil áhersla er lögð á umhyggju fyrir barninu sem einstaklingi með réttindi og skyldur. Barnið á rétt á að þroskast í gegnum leik á eigin forsendum eins og frekast er unnt og velja sér viðfangsefni undir leiðsögn kennara. Á Álfasteini á að vera gaman að leika sér og vera til yfirleitt. Með leikskólastarfinu viljum við líka sjá börnin þróa með sér sterka sjálfsmynd, lífsgleði og ánægju. Þau verði sjálfsöguð, líti á hreyfingu og hollustu sem hluta af daglegu lífi og séu fær um að sýna virðingu og vináttu í samskiptum. Jafnframt viljum við stuðla að alhliða þroska þeirra.

Í daglegu starfi leggjum við áherslu á það umhverfi sem næst er barninu, barnið sjálft og fjölskyldu þess. Lögð er áhersla á að viðhalda íslenskum siðum og venjum, jafnhliða því að opna augu barnanna fyrir fjölmenningu og fjölbreytileika lífsins.

Stefna leikskólans:

• að börnin öðlist leik- og sköpunargleði.
• að börnin hafi virðingu og vináttu að leiðarljósi í samskiptum.
• að börnin verði meðvituð um náttúruna og umhverfið.
• að börnin verði meðvituð um mikilvægi hreyfingar og hollustu.

Leiðir að markmiðum eru:

Að börnin öðlist leik- og sköpunargleði.

• Gefum frjálsum leik og listsköpun alltaf nægan tíma og rúm í dagskipulagi skólans.
• Stuðlum að því að börnin öðlist öryggi í leik- og listsköpun.
• Hvetjum börnin til að leika sér og skapa bæði ein og í hóp.
• Stuðlum að því að börnin geti tekið sjálfstæðar ákvarðanir um val á viðfangsefnum.
• Hvetjum börnin til að vinna út frá eigin skynjun og hugmyndum.
• Höfum aðgengilegan margskonar efnivið í listsköpun og leik sem vekur forvitni og rannsóknarlöngun barnanna.
• Kynnum börnunum íslenskar hefðir og fjölbreytta menningu.

Að börnin hafi virðingu og vináttu að leiðarljósi í samskiptum.

• Hvetjum börnin til að sýna öðrum hlýlegt og vingjarnlegt viðmót.
• Leggjum áherslu á að börnin læri að leysa úr ágreiningsmálum.
• Börnin nýti sér Jákvæðan aga til að auka félagsfærni og lífsleikni sína.
• Heilsumst og tökum undir kveðjur með bros á vör.
• Erum vakandi fyrir því að hrósa og hvetja börnin.
• Erum heiðarleg og hreinskilin í samskiptum hvert við annað.
• Hvetjum börnin til að eiga frumkvæði og sýna sjálfstæði í starfi.
• Hvetjum börnin til að tala saman og hlusta hvert á annað.

Að börnin verði meðvituð um náttúruna og umhverfið.

• Kynnum fyrir börnunum dýr og gróður.
• Förum í vettvangs- og gönguferðir.
• Kynnum börnunum endurvinnslu og mikilvægi hennar fyrir náttúruna.
• Kynnum börnunum breytileika náttúrunnar frá einni árstíð til annarrar.

Að börnin verði meðvituð um mikilvægi hreyfingar og hollustu.

• Bjóðum upp á hollt og gott fæði.
• Stuðlum að daglegri hreyfingu barnanna úti og inni.
• Fræðum börnin um næringu og heilbrigði gegnum leik og starf.
• Eflum líkamsvitund barnanna og aukum hreyfifærni þeirra.

Með eflingu þessara þátta ýtum við undir alhliða þroska barna á leikskólaaldri. Það er þau fá góða fræðslu um næringu og hreyfingu og góða sjálfsvitund. Mikla æfingu í félagslegum samskiptum ásamt því að efla forvitni og auka færni sína til þekkingaröflunar.